หย้อนเห็นแก่กิน
คอลัมน์/ชุมชน
ปลาเขงตายตุ้มย้อน หนอนปลาแดกเบ็ดซิด ติดศพแด่ดึงพรต จ่องแฮงบ่หลุดได้ เขาดึงให้แฮงขึ้น มาเถิงตาฝั่ง หวังเอาไปใส่ข้อง คอยถ่าแต่ความตาย ฯ ปลาค่อโตใหญ่แท้ เห็นแก่ความกิน ยินเขียดจะนาแขวน อยู่คันนาน้อย เหลียวบ่เห็นไผจ้อย เห็นเขียดลอยอยู่เพียงหน้า เขียดจะนาแด่แด่วดิ้น ตีน้ำปั่นฟอง ฯ ปลาค่อคึดว่าได้ สมใจอาหารแซบ แนบหางฟาดน้ำปับ ปากกลืนกินเกลี้ยง อาหารดีเพียงลงท้อง หวังลอยทางใหม่ เบ็ดพัดเกาะเสียบไส้ ดึงไว้จ่องคา ฯ ทุกอย่างคนซอกไซ้ ในวิธีหลอกลวงปลา หวังเพื่อมาเป็นอาหาร สู่วันแลงเซ้า ปลาเจ้าจึงแด่ดิ้น เบ็ดบาดพุงปวด พวดขึ้นเขินขาดน้ำ สู่ข้องแห่งคน ฯ สันดานโดยดั่งด้าน ขานกล่าวซาวมนุษย์ สุดสิหลอกลวงกัน ส่องหาบ่เห็นฮู้ เพราะว่าหมู่คนนี้ ลายในนั้นเบิ่งยาก หากบ่คือเสือโคร่งเดียว ลายเกี้ยวอ้อมโต ฯ เห็นแต่ความอยากได้ ให้เขาอ่อยลวงตา หาเงินแดงอ่อยอ้าง ซ่างหลงไหลไปได้ รับใช้กลอุบายให้ มารมาซี้สั่ง ชายหนุ่มยังมาเสียท่าย้อน ผ่อนให้อวิชชา ฯ มิจฉาชีพซอกค้น กลลวงต่อสังคม นิยมโกงกอบกินกัน เครื่องของคนใซ้ ลักกฎหมายเมืองบ้านไว้ บังตาเจ้าหน้าที่ เรื่องปัญหาแบบนี้ ระวังไว้เถิดหมู่เฮา ฯ สุมาตร ภูลายยาว |